حوزہ نیوز ایجنسی کی رپورٹ کے مطابق، جنڈ-اٹک/ جامعہ مسجد غازی امام بادشاہ، جنڈ، ضلع اٹک میں خطبۂ جمعہ کے دوران مولانا لیاقت علی رانجھا نے سورۂ بقرہ کی آیت 208 کی روشنی میں اسلام کو مکمل طور پر اپنانے، دینی تعلیمات پر زندگی کے تمام شعبوں میں عمل کرنے اور شیطان کے گمراہ کن راستوں سے بچنے کی ضرورت پر زور دیا۔ انہوں نے کہا کہ اسلام محض عبادات تک محدود نہیں، بلکہ یہ ایک مکمل نظامِ حیات ہے، جس کی تعلیمات پر عمل کرنا ہر مسلمان کی ذمہ داری ہے۔
مولانا لیاقت علی رانجھا نے اپنے خطاب میں کہا کہ اللہ تعالیٰ نے اہلِ ایمان کو اسلام میں پورے طور پر داخل ہونے کا حکم دیا ہے، جس کا تقاضا ہے کہ مسلمان اپنی زندگی کے کسی بھی شعبے میں اسلامی تعلیمات کو نظرانداز نہ کریں۔ ان کے مطابق، نماز اور دیگر عبادات میں دین پر عمل کرنے کے ساتھ کاروبار، معاملات، اخلاق اور معاشرتی زندگی میں بھی اسلامی اصولوں کی پابندی ضروری ہے۔
انہوں نے اس بات پر زور دیا کہ اسلام کی بعض تعلیمات کو قبول کرنا اور بعض کو نظرانداز کرنا دینی تعلیمات کی جامعیت کے منافی ہے۔ انہوں نے کہا کہ اسلام صرف مسجد یا جمعہ کی نماز تک محدود نہیں، بلکہ زندگی کے تمام شعبوں میں اس کی رہنمائی سے استفادہ کرنا ضروری ہے۔
شیطان کے گمراہ کن طریقوں سے خبردار کرتے ہوئے مولانا لیاقت علی رانجھا نے کہا کہ شیطان انسان کو یکایک بڑے گناہوں کی طرف نہیں لے جاتا، بلکہ وہ اسے بتدریج گمراہی کی راہ پر ڈالتا ہے۔ اس لیے ضروری ہے کہ انسان ابتدا ہی سے ایسے اعمال اور رویوں سے محتاط رہے جو اسے گناہ کی طرف لے جا سکتے ہیں۔ انہوں نے مثال دیتے ہوئے کہا کہ بعض اوقات انسان چھوٹی چھوٹی رعایتوں اور بظاہر معمولی لغزشوں کو اہمیت نہیں دیتا، لیکن یہی چیزیں آگے چل کر بڑے گناہوں کا سبب بن سکتی ہیں۔
انہوں نے مزید کہا کہ قرآن مجید نے شیطان کو انسان کا کھلا دشمن قرار دیا ہے، لہٰذا اہلِ ایمان کو اس کی چالوں سے ہوشیار رہتے ہوئے اپنے عقائد، اعمال اور کردار کی حفاظت کرنی چاہیے۔
مولانا لیاقت علی رانجھا نے اپنے خطاب کے اختتام پر اس بات پر زور دیا کہ کامیاب زندگی کے لیے اسلام کو جزوی طور پر نہیں، بلکہ اس کی جامع تعلیمات کے مطابق اپنانا ضروری ہے۔ انہوں نے مسلمانوں کو دعوت دی کہ وہ اپنی انفرادی اور اجتماعی زندگی کو اسلامی اصولوں کے مطابق استوار کریں اور شیطان کے گمراہ کن راستوں سے بچنے کی مسلسل کوشش کریں۔
آپ کا تبصرہ